CERPEN_-_LEO KETEMU BAPA ( dialeg papua )

Leo Ketemu Bapa 

(kisah nyata) 

Di ceritakan oleh : Leo ............ 

Ditulis dan di publikasikan oleh : oranganeh

Leo yang sedang tidur tiba tiba terbangun karena mendengar keributan antara ayah dan ibunya “sa mo kawin deng orang lain jadi, skarang juga tong dua cerai” Kata ayah Leo kepada ibunya yang sedang duduk dan menangis. Kemudian ibunya berkata “Baru Leo…? Tra mungkin sa sendiri bisa urus dia..!”

“Sa pu nama Leo dan ini sa pu cerita. kejadian itu terjadi waktu sa masih umur 5 tahun, saat-saat yang sulit bagi sa deng sa pu mama untuk tetap hidup, apalagi deng kondisi bapa su pergi kawin deng perempuan lain, trada biaya, trada makanan, hanya minum air putih saja.

Pas bapa su pergi, mama bilang ke sa, ‘Leo sabar eh,nanti mama berusaha’ sa hanya jawab ’Iyo ma.’ Waktu itu di mama pu dompet hanya ada uang Rp.500.000. mama pake beli sirup dan bahan untuk bikin kue yang nanti mama mo jual di depan rumah.

Dari mama pu jualan itu, mama berusaha pelan-pelan kasih sekolah sa, sampe skarang sa su jadi polisi. Satu hal yang buat sa sedih adalah sa slalu rindu ketika kecil bapa bawa sa jalan. Trus sa lihat polisi di pinggir jalan baru sa bilang ’Bapa, besar sa jadi polisi eh,?’ ketika semua su terjadi ternyata sama saja sa bapa su trada. Ada kabar angin yang bilang kalo bapa de su punya dua anak perempuan, Trus bapa su jadi manajer di salah satu cargo yang ada di bandara, tapi itu di kota lain.

Di sa pu umur yang ke 19 Tahun deng posisi sebagai polisi. Semua pendapatan atau gaji yang sa miliki sa simpan. Trus sa bangun kios untuk sa pu mama puji Tuhan di sa pu umur yang ke 27 tahun kios itu su berubah jadi sebuah toko yang ramai pengunjung. Dan bukan mama yang kerja tapi mama rekrut dua tenaga kerja untuk bantu mama disitu. Dan sa pu mama gaji dong deng uang yang nilainya tinggi skali.

Suatu saat, dari Polda. Bilang sa pindah tugas ke salah satu kota, di kota yang sa bapa ada tinggal dan menetap, jadi setelah sa kesana, dan su dua bulan bertugas, semua aman-aman saja dan sa trada niat untuk cari sa bapa, berusaha dapat de pu alamat, sa tra pernah ada niat. sa hanya fokus deng sa pu pekerjaan.tapi sa rindu sa pu bapa. Sampe satu kali pas malam sa mampir di salah satu toko yang ada di situ untuk belanja sa pu kebutuhan, pas mo masuk sa tra sengaja tabrak seorang perempuan jadi de pu kaki kesleo, de maki-maki sa jadi sa bilang ‘aduh minta maaf sodara’ karna tra sampai hati jadi sa bilang ‘mari sudah sa bantu antar sodara ko ke ko pu tempat tujuan, karna kalo sa tra lakukan itu sa berdosa skali, apalagi semua terjadi gara-gara sa, otomatis sa harus tanggung jawab toh?” sa bilang begitu ke dia. Setelah itu de naik ke motor. Di perjalanan de bilang ‘kaka, sa minta maaf tadi su maki-maki, kaka disana’ trus sa bilang ‘ah,trapapa yang penting ko baik-baik saja’ de kastau de pu jalan ke rumah, pas su sampe di de pu rumah, ternyata de pu rumah waktu itu ada ibadah jadi de bilang ’karna kaka su antar jadi, mari duduk-duduk sedikit di rumah sini dulu,tong cerita-cerita’ jadi sa oke-oke saja, kebetulan di kota itu sa tra kenal siapa-siapa

Jadi sa ikut dia duduk, di de pu teras rumah trus cerita-cerita, tra lama begini de pu mama keluar baru bilang ‘eh, kam dua mari masuk makan dulu’ jadi sa dengan dia masuk makan, setelah makan ada de pu sodara perempuan yang datang baru bilang ‘ janet, bapa panggil ko’ karna de pu kaki kesleo jadi de jalan agak sedikit pincang ke de pu bapa di dalam rumah. Tiba-tiba sa dengar de bapa tanya ‘ko pu kaki kenapa’ tapi de jawab ‘ah,tadi mo turun dari taxi baru tergelincir jadi kasleo, baru bapa panggil sa kha…?’ janet de tanya de pu bapa. Trus de pu bapa bilang ‘mama bilang ko deng ko pu teman,laki-laki jadi panggil dia masuk duduk di dalam rumah sini kita duduk sama-sama’ jadi janet de kembali baru de bilang ke sa ‘kaka, mari duduk di dalam sini’

Jadi sa ikut de masuk duduk di dalam de pu rumah. Sementara duduk begini pas sa ada lihat ke televisi yang kebetulan saat itu ada menyala. Sa tra lihat de pu bapa lewat. Baru de pu bapa yang tegur ‘kaka, slamat malam’ pas sa balik sa kaget ternyata janet pu bapa itu, sa pu bapa. jadi langsung sa berdiri baru sa bilang ‘Bapa, ini Leo, Bapa pu anak’ semua orang yang dalam rumah situ kaget, dan suasana berubah menjadi tegang. Baru bapa bilang ‘Tuhan tolong, ini ko?, ko bikin apa disini’ sa bapa datang trus peluk sa sambil menangis, sa juga menangis baru sa bilang ‘sa rindu bapa skali’ sambil peluk erat sa pu bapa. Semua yang ada disitu macam kebingungan jadi semua duduk dan sa bapa cerita trus jelaskan untuk dong semua yang ada disitu baru sa bapa bilang ‘ko disini bikin apa?’ jadi sa jawab ‘sa polisi pa, sa tugas di polres kota situ’ sa bapa tra mampu tahan de pu tangisan, sambil berkata ‘bapa minta maaf, dulu bapa bukan orang yang baik, tapi bapa su mengaku semua ke Tuhan dan bapa su bertobat, kirim salam untuk mama eh’ trus sa bilang ‘bapa tenang saja, sa skarang urus mama baik-baik, sa deng mama su kas maaf bapa. namanya juga takdir dan kehendak Tuhan,kita manusia mau tolak kan tidak bisa” semua disitu saling memahami suasana kembali aman. Lalu Janet berkata. “Yekon, sa hampir jatuh cinta deng sa pu kaka laki-laki sendiri’

 

Note :

Setiap orang punya masa lalu, dan kita hanya bisa menerima,bersyukur,dan menikmati. Dan memiliki jiwa pemaaf di dalam diri. ‘sa tau sa bapa salah, de punya istri baru dan ,keluarga baru tapi, de akan jadi sa punya bapa dalam keadaan apapun’. Jadikan semua masa lalu dari setiap masalahmu sebagai pelajaran. Tuhan tau mana jalan yang baik untuk ko lalui dan mana yang tidak